पुन्हा तेजाब दु:खाचे उरी फेसाळुनी गेले
पुन्हा गाणे तुझे ओठावरी घोटाळुनी गेले
मनाच्या खोल अंधारी कुणाच्या ऐकतो हाका ?
मघाशी कोणते डोळे मला ओवाळुनी गेले ?
कराया लागलो जेव्हा तुझी स्वप्नासवे चर्चा
खुलासे भूतकाळाचे मला गुंडाळुनी गेले
उपाशी प्रश्न हा माझा उभा आहे तुझ्या दारी
'कसे तारुण्य ते होते मला जे टाळुनी गेले ?'
पुरे आता पुरे चर्चा सुळाच्या मोजमापाची
बळीचे रक्तही येथे कधीचे वाळुनी गेले
कुठे होतीस तू जेव्हा दिशा झंकारल्या होत्या ?
कुठे गेलीस तू जेव्हा ऋतू गंधाळुनी गेले
असा काही आला मला जगायाचाच कंटाळा
अता आयुष्यही माझे मला कंटाळुनी गेले
मला तू सांग आकाशा ... तुझा आषाढ कोणाचा ?
अरे ते मेघ होते जे घराला जाळुनी गेले
No comments:
Post a Comment